काठमाडौं – क्रिकेटमा असम्भव केही छैन । भारतमा जारी दृष्टिविहीन महिला टी–ट्वान्टी विश्वकप क्रिकेट प्रतियोगितामा नेपालले आइतबार अमेरिकालाई पराजित गर्दा त्यस्तै रेकर्ड बनाएको छ । अमेरिकाविरुद्ध १० विकेटको जित निकाल्दै सेमिफाइनल प्रवेश गरेको नेपालले चार बलमै लक्ष्य भेट्टाएको हो ।

सुरुमा ब्याटिङ गरेको अमेरिकालाई नौ ओभर ४ बलमा मात्र १७ रनमा अलआउट गर्दै रेकर्ड बनाएको हो । १८ रनको लक्ष्य मात्र ४ बलमा नेपालले भेट्टाएर अनौठो रेकर्ड बनाएको हो ।

यो जितसँगै नेपालले चार खेलबाट छ अङ्क जोडेको छ । यसअघि श्रीलङ्का र अष्ट्रेलियालाई पराजित गरेको नेपालले भारतसँग भने हार बेहोरेको थियो ।

१० विकेटको जित निकालेको नेपालका लागि दिलसरा धमलाले अविजित १२ रन बनाइन् । त्यसअघि टस जितेर पहिला ब्याटिङको निम्तो पाएको अमेरिका नौ दशमलव चार ओभरमा सबै विकेट गुमाउँदै १७ रनमै समेटिएको थियो ।

अमेरिकाका कुनै पनि खेलाडीले दोहोरो अङ्कमा रन जोड्न सकेनन् । नेपालका लागि दिलसरा धमलाले तीन र सुनिता घिमिरेले समान एक÷एक विकेट लिएका थिए ।

भारत र श्रीलंकाले संयुक्त रुपमा आयोजना गरेको प्रतियोगिताका बाँकी खेल श्रीलंकामा हुनेछन् ।