काठमाडौं- चिनियाँ अधिकारीले दुर्व्यवहार गरेपछि अमेरिकाको न्यूयोर्क शहरमा आयोजना हुने भनिएको चलचित्र महोत्सव स्थगित भएको छ । चिनियाँ अधिकारीहरुले दर्जनौँ चिनियाँ चलचित्र निर्देशक तथा उत्पादक र उनीहरुका परिवारमाथि दुव्र्यवहार गरेपछि महोत्सव स्थगित भएको हो ।

मानव अधिकारवादी संस्था ह्युमन राइट्स वाचका अनुसार न्यूयोर्कमा नोभेम्बर ८ देखि १५ सम्म इण्डिचाइना फिल्म फेस्टिभल आयोजना हुने तय भएको थियो । तर, चिनियाँ दुव्र्यवहारका कारण महोत्सव स्थगित गर्नुपरेको आयोजक झु रिकुनले बताएका छन् ।

यसबाट आफ्नो मुलुकका बारेमा दुनियाँले के देख्छ वा पढ्छ भन्ने विषयमा चीनले नियन्त्रण कायम गर्न खोजेको प्रष्ट हुने वाचले जनाएको छ । चिनियाँ कलाकार तथा अभियन्ता चियाङ सीताका अनुसार उक्त महोत्सवमा सहभागी प्रायः सबै निर्देशकलाई चिनियाँ अधिकारीले धम्की दिएका छन् ।

चियाङका अनुसार विदेशमा रहेका र गैरचिनियाँ निर्देशकका आफन्त र साथीभाइले पनि चिनियाँ धम्कीको सामना गरेका छन् । महोत्सव स्थगित भएपछि आयोजक झुले जारी गरेको विज्ञप्तिमा चिनियाँ डरको कारण नभइ निर्देशक, पाहुना र अन्य साझेदारमाथि हुने दुव्र्यवहार रोक्न यस्तो निर्णय गरिएको प्रष्टिकरण दिएका छन् ।