काठमाडौं- पाकिस्तानको माथिल्लो सदनले सेनाप्रमुख असिम मुनिरको शक्ति विस्तार गर्ने प्रस्ताव पारित गरेको छ । यससँगै माथिल्लो सदनबाट पारित प्रस्तावमा सर्वोच्च अदालतको अधिकार पनि सीमित पारिएको छ ।

पाकिस्तानमा परम्परागत रुपमा सेना निकै शक्तिशाली मानिन्छ । पाकिस्तानमा बारम्बार सैन्य कु पनि हुने गरेको इतिहास छ ।

पछिल्लो समय सेनाले खुल्लमखुल्ला कू नगरेपनि नागरिक सरकारमाथि आफ्नो दबाब बढाइरहेको समाचार संस्था रोयटर्सले जनाएको छ । केही महिनाअघि भारतसँग भएको सैन्य टकरावपछि सेनाप्रमुख मुनिरलाई ‘फिल्ड मार्शल’ को उपाधि दिइएको थियो ।

त्यसपछि उनी अमेरिका भ्रमणमा गएका थिए । अमेरिका क्रममा मुनिरले राष्ट्रपति ट्रम्पसँग पनि भेटवार्ता गरेका थिए । भेटवार्ताका क्रममा राष्ट्रपति ट्रम्पले मुनिरलाई ‘आफूलाई मनपर्ने फिल्ड मार्शल’ को संज्ञा दिएका थिए ।

माथिल्लो सदनबाट पारित पछिल्लो प्रस्तावअनुसार मुनिरलाई हवाई तथा नौसेनासहित सम्पूर्ण सैन्य सेवाको कमाण्ड दिइएको छ । यसका लागि ‘चिफ अफ डिफेन्स फोर्सेस’ नामक नयाँ पद पनि सिर्जना गरिएको छ ।

त्यसैगरी, नयाँ प्रस्तावअनुसार सर्वोच्च अदालतले आइन्दा संवैधानिक मुद्दा हेर्नेछैन । संवैधानिक मुद्दा हेर्नका लागि छुट्टै संघीय संवैधानिक अदालत गठन गरिएको छ । यसका न्यायाधीशहरु सरकारले नियुक्त गर्ने प्रावधान छ ।