काठमाडौं- नेपाली कम्युनिस्ट पार्टीका सह-संयोजक माधवकुमार नेपालले आफूहरूको एकता देखेर नेकपा एमालेका अध्यक्ष केपी ओलीले होस गुमाइसकेको बताएका छन् ।

बुधबार मातृभूमि जागरण अभियानका संयोजक डा. भीम रावलसहितलाई नेकपामा स्वागत गर्न आयोजित कार्यक्रममा बोल्दै अध्यक्ष नेपालले आफूहरू एकजुट हुँदा ओलीले होस गुमाइसकेको बताएका हुन् ।

नेपालले अझै पनि एकता प्रक्रिया जारी रहने बताएका छन् । यसअघि नेकपा संयोजक पुष्पकमल दाहाल प्रचण्डले अझै अरू दल र नेता पनि मिसिने बताएका थिए ।

‘हाम्रो एकता र नेकपा निर्माण केहीको होस् गुमिसकेको होला । कसैले होस गुमाएर गालीगलौज गर्नु जरूरी छैन’, उनले भने, ’गाली गर्न छाडेर हामीलाई धन्यवाद दिए हुन्छ। मैले त बिगारेको कम्युनिस्ट आन्दोलनलाई तपाईंहरूले सपारेकोमा धन्यवाद दिन्छु भनेर प्रस्ताव पास गर्नु राम्रो हुन्छ। यदि त्यसो भएमा हामीलाई लागेको घाउमा मलहम हुनेछ ।’

नेपालले नेकपाको एकता अभियान नरोकिने पनि बताएका छन् । यसअघि नेता रावलले बिछोडको दिनको आलो घाउमा मलहम लगाएको जस्तो महसुस भएको बताएका थिए । पेरिसडाँडामा आयोजित कार्यक्रममा सात बुँदे सहमति पत्रमा हस्ताक्षर गरेपछि उनले तत्कालीन नेपाल कम्युनिष्ट पार्टी विभाजन हुँदाको बिछोडको आलो घाउमा मलहम लगाएको जस्तो महसुस भएको बताएका थिए ।

गत कात्तिक १९ मा नेकपा (माओवादी केन्द्र), नेकपा (एकीकृत समाजवादी) लगायत १० कम्युनिष्ट घटक मिलेर नेपाली कम्युनिष्ट पार्टी बनेको थियो । उक्त पार्टीको संयोजक पुष्पकमल दाहाल ‘प्रचण्ड’ छन् । सह-संयोजकमा माधव नेपाल छन् ।