काठमाडौं- नवगठित नेपाली कम्युनिस्ट पार्टीले नेकपा एमालेले थालेको ‘घर फर्क अभियान’लाई नौटंकीको संज्ञा दिएको छ ।

बुधबार काठमाडौंमा एमालेकै पूर्वउपाध्यक्ष डा. भीम रावलसहितलाई पार्टीमा स्वागत गर्ने क्रममा उद्घोषकको भूमिकामा रहेका नेता प्रकाश ज्वालाले यस्तो संज्ञा दिएका हुन् ।

‘कात्तिक २४ गते यही सभाहलमा एउटा नौटंकी भएको थियो, त्यसलाई आजको यो कार्यक्रमले एक किसिमले खारेज गरिदिएको छ’, उनले भने, ‘यही सभाहलमा भएको ‘घर फर्क अभियान’ केबल नौटंकी मात्रै थियो । हजारौँ हजार व्यक्तिहरू अहिले नेपाली कम्युनिस्ट पार्टीमा सामेल हुनु भएको छ।’

उनले नेकपा प्रवेश अभियान र देशव्यापी रुपमा यो लहर चलेको पनि बताएका छन् । ‘केही कम्युनिस्ट पार्टी र समाजवादी पार्टीहरूसँग वार्ता चलिरहेको छ। केही दिनमै एकताको टुंगो लाग्छ’, उनले भने, ‘ती पार्टीहरूको नाम भन्दा छिटो हुन्छ । तर केही दिनमा तपाईंहरूले नतिजा थाहा पाउनु हुन्छ ।’