काठमाडौं- नेपाली कांग्रेसका नेता डा. मिनेन्द्र रिजालले चुनावसम्म पार्टी चलाउन र टिकट वितरण गर्ने जिम्मा महामन्त्रीद्वयलाई दिन प्रस्ताव गरेका छन्।

महामन्त्रीद्वय गगन थापा र विश्वप्रकाश शर्मा तथा उनीहरूका समर्थकहरूले चुनावमा ‘टिकट बेच्न’का लागि संस्थापन पक्षका नेताहरूले महाधिवेशन गर्न नचाहेको भन्ने भाष्यप्रति संकेत गर्दै यस्तो प्रस्ताव गरेका हुन्।

उनले चुनाव जिताए थप हाइ हाई हुने र १५/२० वर्ष पार्टी हाँक्ने जिम्मा पनि उनीहरूले नै पाउने बताए।

‘संस्थापन पक्षका बुढा नेताहरू, तपाईंहरू साइड लागिदिनुस्, चुनावमा टिकट बेच्नका लागि पस्नुभएको भन्ने छ तपाईंहरू हात झिकिदिनुस्,’ केन्द्रीय समितिको बैठकमा रिजालले भने, ‘चुनावसम्म अबको चार महिना पार्टी चलाउने जिम्मा महामन्त्रीद्वयलाई दिउँ, टिकट पनि उहाँहरूले नै बाँड्नुहुन्छ, चुनाव पनि उहाँहरूले नै जिताउनुहुन्छ।’