काठमाडौं- पाकिस्तानमा पत्रकारले संकटको सामना गरिरहेको भन्दै अन्तर्राष्ट्रिय पत्रकार महासङ्घले चिन्ता व्यक्त गरेको छ ।

महासङ्घले पाकिस्तानमा पत्रकारलाई लक्षित गर्दै हत्या, पत्रकार र सञ्चार माध्यमका कर्मचारीविरुद्ध ऐन कानुनको दुरुपयोग, अघोषित सेन्सरसिप, रोजगारी खोसिने अवस्था, समयमै तलब नपाउने र राज्य तथा गैर राज्य पक्षबाट हुने दुव्र्यवहारजस्ता घटना बढिरहेकोमा चिन्ता व्यक्त गरेको हो ।

पाकिस्तानको संघीय पत्रकार युनियन र अन्तर्राष्ट्रिय पत्रकार महासङ्घका प्रतिनिधिबीच भएको वार्तापछि महासङ्घले यस्तो चिन्ता व्यक्त गरेको पाकिस्तानबाट प्रकाशित हुने डन अखबारले जनाएको छ ।

उक्त छलफलमा पाकिस्तान संघीय पत्रकार युनियन र अन्तर्राष्ट्रिय पत्रकार महासङ्घसँगै पेरिसमा मुख्यालय रहेको सिन्डिकेट नेशनल डेस जर्नालिस्टेसका प्रतिनिधि पनि सहभागी थिए ।

महासङ्घले पाकिस्तानका राष्ट्रपति, प्रधानमन्त्री र न्यायाधीशहरुलाई पत्रकारको सुरक्षाका लागि तत्काल कदम चाल्न सरकारलाई आग्रह पनि गरेको छ ।