काठमाडौं– स्वास्थ्य तथा जनसंख्या मन्त्री डा.सुधा शर्माले आधारभूत स्वास्थ्य सेवा सबै नेपालीले निःशुल्क पाउनु पर्ने बताएकी छन् ।

भक्तपुर क्यान्सर अस्पतालको वार्षिकोत्सव समारोहमा बोल्दै मन्त्री शर्माले आधारभूत स्वास्थ्य सेवाको लागि स्थानीय तहका सरकार जिम्मेवार हुनुपर्ने समेत बताइन् । 

संविधानमै उल्लेख भएको निःशुल्क स्वास्थ्य सेवा पाउनबाट कोही पनि नागरिक बञ्चित हुनुहुँदैन त्यसैले आधारभूत स्वास्थ्य सेवा प्रदान गर्न सरकार प्रतिबद्ध हुनुपर्छ । यसको लागि सबैभन्दा धेरै जिम्मेवारी स्थानीय सरकारको हुन्छ उनले भनिन् । 

आधारभूत स्वास्थ्य सेवामा अन्तर्गत सरकारले ९८ प्रकारका औषधिहरू निःशुल्क वितरण गर्दै आएको छ । संविधानमै उल्लेख गरिएको आधारभूत स्वास्थ्य सेवा अन्तर्गतको सेवाहरू स्वास्थ्य बिमा कार्यक्रममा समेत समेटिएको छैन । 

यस्तै सोही कार्यक्रममा स्वास्थ्य मन्त्री डा. शर्माले हालको सरकारको मुख्य जिम्मेवारी भनेको फागुन २१ गते निर्वाचन गराउनु रहेको हुँदा यसमा सबै कटिबद्ध भएर लाग्नु पर्ने पनि बताइन् ।