काठमाडौं- चीनले दबाब दिएपछि बेलायतको एउटा विश्वविद्यालयले मानव अधिकारसँग सम्बन्धित विषयको शोध नै रद्द गरेको पाइएको छ । बेलायतको शेफिल्ड हलम विश्वविद्यालयले चीनको दबाबका कारण चीनमा बँधुवा मजदुर र आपूर्ति श्रृङ्खलासँग सम्बन्धित शोध रद्द गरेको हो ।

बेलायती अखबार द गार्जियनका अनुसार उक्त विश्वविद्यायलमा रहेको हेलेना केनेडी सेन्टर फर इन्टरनेशनल जस्टिस नामक शोधकेन्द्रमा लउरा मर्फीले यस विषयमा शोध गरिरहेकी थिइन् । उनको शोधको विषय चीनका अल्पसङ्ख्यक उइग्युर मुसलमानको मानव अधिकारसँग सम्बन्धित रहेको थियो ।

उइग्युर मुसलमान समुदायलाई चीनले बाध्यकारी श्रममा लगाउने गरेको भन्दै लामो समयदेखि आलोचना हुँदै आएको छ । चीन सरकारले भने यस्तो आरोपको खण्डन गर्दै आएको छ ।

मर्फीको शोधलाई पश्चिमा मुलुकका सरकार तथा संयुक्त राष्ट्रसंघले बारम्बार उद्धृत पनि गर्दै आएका छन् । तर, गत फेब्रुअरी महिनामा उनलाई आफ्नो शोध तत्काल रोक्न आग्रह गरेको थियो ।

उनले प्रयोग गर्ने ‘फोर्स लेबर ल्याब’ नामक वेबसाइट पनि बन्द गरियो । अक्टोबर महिनामा भने विश्वविद्यालयले माफी माग्दै मर्फीको शोधमा लगाएको प्रतिबन्ध फुकुवा ग¥यो । यस घटनाबाट बेलायती विश्वविद्यालय पनि चिनियाँ प्रभाव र दबाबको मारमा रहेको प्रष्ट भएको गार्जियनले उल्लेख गरेको छ ।