कास्की – जेनजी आन्दोलनको अवसरमा सवारी चालक अनुमति पत्र (लाइसेन्स) तथा मोटरसाइकल चोरी गरेको आरोपमा कास्की प्रहरीले चार जनालाई पक्राउ गरेको छ।

प्रहरीका अनुसार पक्राउ पर्नेमा गोरखा घर भई हाल पोखरा–५ बस्ने २८ वर्षीय दीपक कुँवर र धादिङ घर भई पोखरा बस्ने २३ वर्षीय दीपक राना मगर छन्। उनीहरू भदौ २४ गतेको आन्दोलनका बेला लुटपाट, तोडफोड र आगजनीमा संलग्न रहेको आरोपमा पक्राउ परेका हुन्।

उनीहरूको साथबाट प्रहरीले डेल कम्पनीका तीनवटा सीपीयू, एकवटा मनिटर, किबोर्ड, माउस, प्रिन्टर, मल्टिप्लग सहित विभिन्न व्यक्तिका नाममा रहेका ३६ वटा सवारी चालक अनुमति पत्र बरामद गरेको जनाएको छ। साथै बा ५९ प ८४३८ नम्बरको पल्सर मोटरसाइकल पनि फेला पारिएको छ।

कास्की प्रहरीका सूचना अधिकारी हरिबहादुर बस्नेतका अनुसार उनीहरूविरुद्ध आपराधिक उपद्रव सम्बन्धी कसुरमा अनुसन्धान भइरहेको छ। अदालतबाट चार दिनको म्याद थप गरी थप विवरण संकलन भइरहेको प्रहरीले जनाएको छ।

यसैबीच, आन्दोलनकै क्रममा जिल्ला प्रहरी कार्यालय परिसरबाट सवारीसाधन चोरी गरेको आरोपमा थप दुई जना पक्राउ परेका छन्।जिल्ला ट्राफिक कार्यालय अगाडि पार्किङमा राखिएको ग ६ प २०६१ नम्बरको मोटरसाइकल चोरी गर्ने पोखरा–५ का विश्वराज परियार र पोखरा–१४ का देवकुमार लोदिया पक्राउ परेका हुन्।

उनीहरूले प्रहरी कर्मचारीकै मोटरसाइकल चोरी गरी चलाएको प्रहरीले जनाएको छ। दुवैजनामाथि चोरी सम्बन्धी मुद्दामा ६ दिनको म्याद थप गरी अनुसन्धान भइरहेको कास्की प्रहरीले जनाएको छ।