काठमाडौं- मोरङको रंगेलीमा हाइनाको एउटा बथान देखिएको छ । हाइनाको यो बथान भारततिरबाट नेपाली भूभागमा छिरेको अनुमान गरिएको छ।

गयराति करिब ११ बजे मोरङको रङ्गेली नगरपालिका–५ बहुवानचोकदेखि चान्दनीचोक जाने बाटोमा हाइनाको बथान देखिएको स्थानीयले बताएका छन् ।

स्थानीयबासीले भेटेका हाइना (लकरबग्गा) कहाँबाट आएको हो भन्ने खुलेको छैन । तर केही स्थानीयबासीले यी हाइनाका बथान भारतबाट नेपाल प्रवेश गरेको अनुमान गरेका छन् ।

हाइनालाई नेपालमा केहीले जंगली कुकुर वा हाँस्ने जनावर पनि भन्छन् । यो जनावरले आवाज निकाल्दै हाँसे जस्तै लाग्ने गर्छ। हाइना मांसाहारी जनावर हो, यसले समूहमा शिकार गर्ने गर्दछ ।

यो कुकुरजस्तै देखिने भए पनि बिरालो वर्गसँग बढी नजिक मानिन्छ । विशेषगरी यो जनावर अफ्रिका धेरै र एसियाका केही ठाउँमा पाइन्छ। यसले प्रायः गरेर मरेका जनावरको मासु खान्छ । यसको सामूहिक रुपमा शिकार गरेर पनि पेट भर्न सक्छ ।

हाइनाका मुख्य गरी चार प्रजाति छन् । स्पोट्टेड हाइन, स्ट्रिपेड हाइना, ब्राउन हाइन र आर्डवल्फ रहेका छन् ।