काठमाडौं– मधेस प्रदेशका मुख्यमन्त्री जितेन्द्र सोनलले आज प्रदेशसभामा विश्वासको मत लिँदै छन् । विश्वासको मत प्रयोजनका लागि आज दिउँसो १ मधेस प्रदेशसभा बैठक बोलाइएको छ ।

मधेसका पूर्व मुख्यमन्त्री सतिशकुमार सिंहले पदबाट राजीनामा दिएपछि लोकतान्त्रिक समाजवादी पार्टी (लोसपा) का नेता सोनल गत असोज २९ गते मुख्यमन्त्रीमा नियुक्त भएका थिए ।

सोनलले नेपालको संविधानको धारा १६८को उपधारा (४) बमोजिम विश्वासको मत लिन लागेका हुन् ।

१०७ सदस्यीय प्रदेश सभामा तीनजना निलम्बनमा रहेकाले हाल १०४ जना सदस्य कायम छन् । विश्वासको मत प्राप्त गर्नका लागि ५३ सांसदको समर्थन आवश्यक पर्दछ । सोनल मुख्यमन्त्री बन्दा ५ दलका ५६ प्रदेशसभा सदस्यहरूको समर्थन रहेकाले उनले आज विश्वासको मत पाउने निश्चितजस्तै छ ।

सोनल नेतृत्वको सत्तारुढ गठबन्धनमा जसपा नेपालका १८, जनमत पार्टीका १३, माओवादी केन्द्रका ९, लोसपाका ८, एकीकृत समाजवादीका ७ र नेपाल संघीय समाजवादी पार्टीका १ जना सांसद रहेका छन् । प्रदेशसभाका दुई ठूला दल नेपाली कांग्रेस र नेकपा एमाले विपक्षमा छन् ।