काठमाडौं- नेकपा (एमाले) का अध्यक्ष केपी शर्मा ओलीले सुशीला कार्की संविधान मिचेर प्रधानमन्त्री बनेको टिप्पणी गरेका छन् ।

प्रधानमन्त्री कार्की नेतृत्वको सरकारलाई असंवैधानिक र प्रतिगामीको संज्ञा दिएका ओलीले कसैले संविधान मिच्न नपाइने पनि बताए ।

एमालेको शिक्षा तथा मानवस्रोत विभागद्वारा शुक्रबार काठमाडौंमा आयोजित कार्यक्रमलाई सम्बोधन गर्दै ओलीले यस्तो टिप्पणी गरे ।

‘पूर्वप्रधानन्यायाधीश भएको मानिस आफैँले संविधान मिचेर प्रधानमन्त्री हुनु गलत हो । यो भनेको सोझै असंवैधानिक, प्रगिगामी संविधान मिचुवा, हाहुको भरमा बनेको सरकार हो’, उनले भने ।

प्रधानन्यायाधीश भइसकेको मान्छे मानवअधिकार आयोगबाहेक अन्य कुनै ठाउँमा नियुक्त हुन नपाउने उनले तर्क गरे ।

पूर्वप्रधानमन्त्री ओलीले २-३ हजार केटाकेटीले डिस्कर्डमा जम्मा भएर भोटिङ गरेर कार्कीलाई प्रधानमन्त्री बनाएको टिप्पणी गरे । उनले प्रधानमन्त्री कार्की नेतृत्वको सरकारलाई हावाको भरमा बनेको हाहु सरकारको पनि संज्ञा दिएका छन् ।

अध्यक्ष ओलीले भदौ २४ गतेको आगजनी र तोडफोडको बलबाट बनेको सरकार संविधानअनुसार हुँदै नभएको जिकिर गरे । यो सरकारले लोकतन्त्र, संविधान र जनताको प्रतिनिधित्वसँग वैरभाव बोेको पनि ओली आरोप लगाएका छन् ।