काठमाडौँ– नेपाल प्रहरीका आईजीपी चन्द्रकुवेर खापुङसँग जेनजी आन्दोलनको घटना छानबिन गर्न गठित जाँचबुझ आयोगले बयान लिएको छ। जेनजी आन्दोलनको घटनाबारे पूर्वन्यायाधीश गौरीबहादुर कार्की नेतृत्वको आयोगले बयान लिएको हो।

आयोगले यसअघि नै प्रहरी प्रधान कार्यालयलाई पत्र पठाएर भदौ २३ गते फिल्डमा खटिएका प्रहरी कमान्डर तथा अधिकारीको विवरण माग गरेको थियो। जवाफमा प्रहरी प्रधान कार्यालयले जवानदेखि आईजीपीसम्म सबै फिल्डमा रहेको जानकारी गराएको थियो।

प्रहरीले फिल्डमा खटिएकाको जवाफ माग गरेपछि प्रहरी आयोगसँग रुष्ट छ। आयोगका संयोजक कार्कीले नै प्रहरीले सहयोग नगरेको गुनासो गरिसकेका छन्।

‘प्रहरी प्रधान कार्यालयले भदौ २३ गते गते गोली चलाएर युवाहरूको ज्यान गएको विषयमा प्रहरीको को कमान्डर खटिएको भन्ने प्रश्नमा टालटुले जवाफ दियो, ’ आयोग स्रोतले भन्यो, ‘जवानदेखि आईजीपीसम्म नै फिल्डमा खटिएको भनेपछि आईजीपीलाई नै बयानमा बोलाइयो।’

आयोगले उक्त दिन फिल्डमा खटिएका प्रहरी अधिकारीहरुसँग बयान लिने तयारी गरिरहेको छ। सम्भवत बिहीबार या शुक्रबार प्रहरीका अन्य अधिकारीसँग आयोगले बयान लिनेछ।

आजै बुधबार राष्ट्रिय स्वतन्त्र पार्टीका सभापति रवि लामिछानेसँग पनि आयोगले बयान लिएको थियो।