सिन्धुपाल्चोक- जिल्लाको इन्द्रावती गाउँपालिकास्थित भुवनेश्वरी आधारभूत विद्यालयकी प्रधानाध्यापक अञ्जना भण्डारीलाई त्यही विद्यालय व्यवस्थापन समितिका अध्यक्षले आक्रमण गरेका छन् ।

उक्त कुराबारेको जानकारी नेपाल शिक्षक महासङ्घ ईन्द्रावती गाउँपालिका कार्यसमितिले बुधबार वक्तव्य नै निकालेर दिएको हो । घटनाको महासघंले कडा निन्दा गरेको छ।

महासङ्घले बुधबार एक विज्ञप्ति जारी गर्दै उक्त पालिकाको वडा नं. १ का वासिन्दा तथा विद्यालय व्यवस्थापन समिति अध्यक्ष रमेश (खाम्सोङ) तामाङले प्रधानाध्यापक भण्डारीमाथि अभद्र व्यवहार गर्दै कुटपिट गरेको जनाएको छ। उक्त आक्रमणमा संलग्न तामाङलाई महासंघले कानुनी कारबाहीको माग गरेको छ।

यही मंगलबार मध्यान्ह विद्यालय व्यवस्थापन समितिको बैठक चलिरहेको समयमा तामाङले भण्डारीमाथि गालीगलौज र बेइज्जती गर्दै आँखा र गालामा चोट पुग्ने गरी आक्रमण गरेका खुलेको छ।

महासङ्घले सो घटनालाई निन्दनीय र अमानवीय भन्दै आपत्ति जनाएको छ । ‘यस घटनाका दोषीलाई तत्काल कानुनी दायरामा ल्याई कडा कारबाही गर्नुपर्छ। ढिलाइ भएमा महासङ्घ कुनै पनि मूल्य चुकाउन तयार छ’, महासंघले भनेको छ।

विज्ञप्तिमा महासङ्घका अध्यक्ष विनुमहादुर थापा, उपाध्यक्ष नवराज घरेल र सचिव कृष्णप्रसाद श्रेष्ठले संयुक्त वक्त्वय निकालेर प्रधानाध्यापक भण्डारीको स्वास्थ्य लाभको कामना गर्दै शिक्षकमाथिको आक्रमण रोक्न सम्बन्धित निकायलाई प्रभावकारी कदम चाल्न आग्रह गरेको छ।