काठमाडौं- समान विचार भएका राजनीति दल र शक्तिसँग सहकार्य र एकताका लागि राप्रपा नेपालले पहल थालेको छ।

राप्रपाका वरिष्ठ उपाध्यक्ष राजीव पराजुलीको संयोजकत्वमा गठित वार्ता समितिले मंगलबार राष्ट्रिय प्रजातन्त्र पार्टीका अध्यक्ष राजेन्द्र लिङ्देनसँग एकताको औपचारिक प्रस्ताव गरेको छ।

लिङ्देन निवास ललितपुरको लामाटारमा बिहान भएको भेटघाट र छलफल सकारात्मक रुपमा अघि बढेको वार्ता समितीका सदस्य एवम् राप्रपा नेपालका महामन्त्री राजाराम बर्तौलाले बताए ।

मुलुकको पछिल्लो राजनितीक घटनाक्रम र ध्रुवीकरणबारे गम्भीर छलफलसहित समान विचार भएकाहरूबीचको सहकार्य र एकताको आवश्यकताबारे त्यसक्रममा गहिरो चर्चा भएको उनले बताए ।

‘राप्रपा अध्यक्ष लिङ्देनले एकता प्रस्तावलाई सकारात्मक रुपमा लिनुभएको छ’, लिङ्देनको भनाई उधृत गर्दै बर्तौलाले भने, ‘पार्टीभित्र छलफल गरि चाँडै छलफलमा बस्ने जवाफ दिनु भएको छ ।’

लिङ्देनसँगको छलफलमा राप्रपा नेपालको तर्फबाट वार्ता समिति संयोजक राजीव पराजुली, सदस्यद्वय तेज कुरुङवाङ र राजाराम बर्तौला सहभागी थिए ।