भारत र बेलायतका युद्धपोतले इतिहासमै पहिलो पटक सैन्य अभ्यास गरेका छन् । यी दुई देशका नौसेनाले गरेको अभ्यासलाई एक्सरसाइज कोन्कन २०२५ नाम दिइएको छ । यो अभ्यास अक्टोबर ५ मा भारतको पश्चिमी तटमा सुरु भएको हो ।

यसबारे भारतस्थित बेलायती रक्षा सल्लाहकारले जानकारी दिएका हुन् । सामाजिक सञ्जाल एक्समा पोस्ट गर्दै दिइएको जानकारी अनुसार एक्सरसाइज कोन्कनको उद्देश्य बेलायत र भारतका नौसेनाबीच उच्च समुद्री क्षेत्रमा संयुक्‍त समुद्री र हवाई क्षमताहरू अभिवृद्धि गर्नु हो ।

पोस्टमा भनिएको छ, “एतिहासिक पहिलो कदम ! बेलायत र भारतका क्यारियर स्ट्राइक समूहहरू एकसाथ जोडिएका छन् एक्सरसाइज कोन्कनले दुवै देशका नौसेनाबीच उच्च समुद्रमा संयुक्‍त समुद्री र हवाई क्षमताहरू सुदृढ गर्ने लक्ष्य राखेको छ ।”

यस अभ्यासमा बेलायतको नेतृत्व एचएमएस प्रिन्स अफ वेल्सले गरेको छ । भारतस्थित बेलायती दूतावासका रक्षा सल्लाहकारका अनुसार यो सैन्य अभ्यासपछि उक्त नौसैनिक युद्धपोतले मुम्बई र गोवा भ्रमण गर्ने छ ।

भारतीय नौसेनाले एक्समा गरेको एक पोस्टमा भनिएको छ, ‘एक्सरसाइज कोन्कन २०२५ सुरक्षित, खुला र स्वतन्त्र समुद्र सुनिश्चित गर्ने साझा प्रतिबद्धताको सुनिश्चितता हो । यसले रणनीतिक सम्बन्धहरूलाई सुदृढ पार्दै क्षेत्रीय समुद्री स्थिरतामा योगदान दिनेछ र इण्डिया–यूके भिजन २०३५ अन्तर्गतको व्यापक रणनीतिक साझेदारीलाई थप मजबुत बनाउनेछ ।”