काठमाडौं – कात्तिक १४ बाट प्रदर्शनरत फिल्म ‘परान’को सुरुवाती दुई दिनको व्यापार सुखद नरहेको निर्माता रञ्जित आचार्यले बताएका छन् ।

फिल्मको हल भिजिटका दौरान निर्माता आचार्यले दर्शकबाट फिल्मले राम्रो प्रतिक्रिया पाउँदा पनि व्यापार सुखद नरहेको दाबी गरे ।

चलचित्र विकास बोर्डले उपलब्ध गराएको रियल टाइम बक्स अफिस रिपोर्ट आफ्नो डिभाइसमा अपडेट भइनसकेको उनको भनाइ छ ।

झरी दर्शक हलसम्म आउने वातावरण प्रतिकुल बनेको र फिल्म हेर्दा दर्शक रोएको दृश्यले गलत सन्देश प्रवाह भएकाले ‘परान’को सुरुवाती व्यापार कमजोर भएको उनको बुझाइ छ ।

उनले भने, ‘सुरुमा झरी पनि बिथोल्यो । हाम्रो फिल्ममा पनि पहिलाकै जस्तो आशुको व्यापार भयो भन्ने दर्शकमा बुझाइ पनि भयो जस्तो लाग्छ ।’

यो फिल्म प्रदर्शनमा आउनु एक दिनअघि बिहीबारदेखि आइतबारसम्म झरी परेको थियो ।

तर, आफूहरूले फिल्मको व्यापारका लागि आशुको फन्डा नझिकेको उनको दाबी छ । उनी थप्छन्, ‘हाम्रो फिल्मले दर्शकलाई साँच्चिकै भावुक बनाएका कारण उहाँहरू रुनुभएको हो ।’

दर्शक स्वतःस्फूर्त रोएको सन्देश प्रवाह भएसँगै फिल्म हेर्न दर्शकको उपस्थिति बढेको उनको भनाइ छ ।

उनले भने, ‘पहिलो दिन हाम्रो फिल्मले ६४ सो पाएको थियो । शनिबार केही घट्यो । आइतबार हाउसफूल भएका हलहरूले नै सो बढाएका छन् । फिल्म साँच्चै राम्रो बनेको दर्शकले बुझ्दै हुनुहुन्छ । हलमा उहाँहरूको उपस्थिति बढ्दै छ ।’

दर्शक बढ्ने क्रम रहेकाले र सकारात्मक प्रतिक्रिया पाउने क्रम बढ्दो रहेकाले आफूहरू फिल्मको व्यापारबाट निरुत्साहित नभएको उनले बताए ।

उनले दाबी गरे, ‘हाम्रो फिल्ममा अग्र्यानिक रुपले दर्शक बढ्दै हुनुहुन्छ ।’

नीर शाह शीर्ष भूमिकामा रहेको यस फिल्ममा नायकहरू प्रवीण खतिवडा, महेश त्रिपाठी, नायिकाहरू केकी अधिकारी र अञ्जना बराइली मुख्य भूमिकामा रहेका छन् ।

यही फिल्मबाट दीपक आचार्य ‘काकु’ले निर्देशनमा डेब्यू गरेका छन् ।

उद्योगी/व्यापारी शेखर गोल्छा र रञ्जितको संयुक्त लगानी रहेको बाइस्कोप सिनेमा प्रालिले यो फिल्म निर्माण गरेको हो ।