काठमाडौं– नेपाल नर्सिङ संघले पारिश्रमिकलगायतका नर्सहरूका मागहरू ४८ घण्टाभित्र पूरा गर्न अल्टिमेटम दिएको छ ।
आइतबार संघले एक विज्ञप्ति जारी गर्दै ४८ घण्टाभित्र मागहरू पूरा नभए इमर्जेन्सीबाहेकका सेवाहरू बन्द गर्ने निर्णय गरेको छ ।
संघले ४८ घण्टाभित्र मागहरू सम्बोधन नभएमा सरकारी, निजी, गैरसकारी, मेडिकल कलेज तथा प्रतिष्ठानमा अत्यावश्यकबाहेकका सम्पूर्ण नर्सिङ सेवाहरू ठप्प पार्ने जनाएको छ ।
‘४८ घण्टाभित्र हाम्रो मागहरू सम्बोधन नभएमा सरकारी, निजी, गैरसकारी, मेडिकल कलेज तथा प्रतिष्ठानमा अत्यावश्यकबाहेकका सम्पूर्ण नर्सिङ सेवाहरू निजी तथा सरकारी स्वास्थ्य संस्थाहरूमा देशव्यापी ठप्प पार्ने घोषणा गर्दछौँ,’ संघले भनेको छ ।
संघले आन्दोलनमा उत्रिसकेका नर्सहरूलाई कुनै प्रकारको दबाब, प्रभाव, डर, त्रास वा धम्की नदिनसमेत सचेत गराएको छ ।
संघले १५ कात्तिकमा स्वास्थ्य तथा जनसंख्या मन्त्रालयका भएको बैंठकमा सरकारीसरह न्यूनतम पारिश्रमिकलगायत अन्य सेवा सुविधा सुनिश्चितता गर्ने सहमति भएको थियो ।
तर, अन्य बुँदाहरूमा सहमति नभएको भन्दै आन्दोलनरत नर्सहरू नेपाल नर्सिङ संघको कार्यालय घेराउ गरेका थिए ।
त्यसपछि आइतबार नेपाल नर्सिङ संघ र आन्दोलनरत नर्सहरुबीच आन्दोलनका कार्यक्रमहरू अगाडि बढाउने सहमति भएको थियो ।
सोही सहमतिअनुसार संघले ४८ घण्टाभित्र आन्दोलनरत नर्सका मागहरू सम्बोधन गर्न अल्टिमेटम दिएको हो ।
प्रतिक्रिया