काठमाडौं– बलिउडका बादशाह शाहरुख खानले आफ्ना प्रशंसकहरूलाई जन्मदिनकै अवसरमा विशेष उपहार दिएका छन् । आइतबार आफ्नो ६० औं जन्मदिनका अवसरमा अभिनेता खानले आफ्नो बहुप्रतीक्षित फिल्म ‘किङ’ को टिजर सार्वजनिक गर्दै फ्यानहरूको उत्साह दोब्बर बनाएका छन् ।

रेड चिलीज इन्टरटेनमेन्ट र सिद्धार्थ आनन्दले सामाजिक सञ्जालमार्फत फिल्मको भव्य शीर्षक र शाहरुखको पहिलो लुक सार्वजनिक गरेका छन् । टिजरमा शाहरुखलाई एकदमै फरक र रहस्यमय अवतारमा देखाइएको छ, जसले उनका फ्यानहरूलाई रोमाञ्चित बनाएको छ ।

रेड चिलीज इन्टरटेनमेन्ट र मर्फ्लिक्स पिक्चर्सको संयुक्त ब्यानरमा निर्माणाधीन यो फिल्म सन् २०२६ मा रिलिज हुने बताइएको छ । ‘किङ’ मा शाहरुखलाई अघिल्ला सबै भूमिकाभन्दा फरक रूपमा प्रस्तुत गरिनेछ, जसको पहिलो झलकले नै बलिउडमा ठूलो हल्ला पारेको छ ।