काठमाडौँ– प्रधानमन्त्री सुशीला कार्कीले प्रमुख तीन दलका तीन नेतृत्वलाई भेटेर कुरा गर्न आफूलाई मनै नभएको बताएकी छन्।

प्रधानमन्त्रीको सरकारी निवास बालुवाटारमा विभिन्न मिडियाका सम्पादकहरुसँगको छलफलमा उनले आफूलाई तीन शीर्ष नेताहरु शेरबहादुर, केपी शर्मा ओली र पुष्पकमल दाहाल ‘प्रचण्ड’सँग भेटेर कुरा गर्ने मनै नभएको बताएकी हुन्। उनले आफूलाई मन नभएको र जेनजीले पनि अंकुश लगाएको बताइन्।

उनले तीन नेता फागुन २१ को निर्वाचनअघि नै नेतृत्व छोडेर बिदा हुँदा देशमा राजनीतिक सञ्चार हुने पनि बताइन्।

‘तीन नेतासँग भेटेर कुरा गर्न मन मलाई नै छैन। त्यसैमाथि जेनजीले अंकुश पनि लगाएका छन्,’ उनले भनिन्, ‘उहाँहरु आफैँ बहिर्गमन भएर राजनीतिको सञ्चार चलायमान बनाउन योगदान दिए हुने हो।’

उनले दलका नेताले बहिर्गमन भएर चुनावी वातावरण तयार पारिदिन पनि आग्रह गरिन्।
आफूले तीन नेतालाई भेट्न नचाहेको तर उनीहरुले आफूलाई भेट्न चाहे बालुवाटारले सँधै स्वागत गर्ने पनि सुनाइन्।