टिब्लिसी- रेडियोधर्मी पदार्थ युरेनियम खरिद गर्ने प्रयास गरेको आरोपमा जर्जियामा तीन जना चिनियाँ नागरिक पक्राउ परेका छन् । जर्जियाको राजधानी टिब्लिसीमा राष्ट्रिय सुरक्षा सेवाका अधिकारीले उनीहरुलाई पक्राउ गरेका हुन् ।

अल जजीराका अनुसार उनीहरुले रुस हुँदै चीनतर्फ युरेनियम तस्करी गर्ने योजना बनाएका थिए । उनीहरुलाई पक्राउ गरिएको भिडियो पनि सार्वजनिक गरिएको छ ।

उनीहरुले उक्त पदार्थ तस्करी गर्ने विषयमा आपराधिक समूहसँग छलफल गरेको जनाइएको छ । सुरक्षा सेवाले उनीहरुलाई कहिले पक्राउ गरिएको थियो भन्नेबारे केही खुलाएको छैन ।

समाचारमा जनाइएअनुसार पक्राउ परेका संदिग्धहरुले उक्त पदार्थका लागि ४ लाख अमेरिकी डलर खर्च गर्ने योजना बनाएका थिए ।

यस घटनामा दोषी पाइए उनीहरुलाई १० वर्ष कैद सजाय हुनसक्ने जनाइएको छ । पछिल्ला केही वर्षयता जर्जियामा यस्ता गैरकानुनी पदार्थको खरिदका घटना दोहोरिँदै आएका छन् ।

गत जुलाई महिनामा मात्रै प्रहरीले एक जना जर्जियाली र एक जना टर्किश नागरिकलाई पक्राउ गरेको थियो ।