काठमाडौं– नेकपा माओवादी केन्द्रका संयोजक पुष्पकमल दाहाल ‘प्रचण्ड’ले देशमा उत्पन्न राजनीतिक जटिलता, जनअपेक्षा, राष्ट्रिय स्वाधीनता र लोकतन्त्रमा देखा परेका चुनौती समाधान गर्न वामपन्थी एकता र राष्ट्रिय सहकार्य आवश्यक रहेको बताएका छन्।

सामाजिक सञ्जाल फेसबुकमार्फत आज अपिल जारी गर्दै प्रचण्डले राष्ट्रले भोगिरहेका समस्या र संकटहरूको समाधान अग्रगामी विचार, प्रतिवद्ध सङ्गठन र इमानदार राजनीतिक पहलकदमीबाट मात्रै सम्भव हुने उल्लेख गरेका छन्।

उनले भनेका छन्, ‘देशभक्त, प्रगतिशील र वामपन्थी शक्तिहरूबीच सङ्गठनात्मक ध्रुवीकरण तथा लोकतान्त्रिक शक्तिहरूबीच राष्ट्रिय सहकार्य अपरिहार्य बनेको छ।’

प्रचण्डले संविधानको रक्षा, समुन्नत लोकतन्त्रको विकास र राष्ट्रिय स्वाधीनताको संरक्षणका लागि सबै गणतान्त्रिक शक्तिहरूलाई राष्ट्रिय एकताको साझा मोर्चामा उभिन आह्वान गरेका छन् ।

उनले माओवादीसहितका सबै वामपन्थी शक्तिहरूलाई एउटै कम्युनिस्ट पार्टीको झण्डामुनि एकताबद्ध हुन पनि हार्दिक अपिल गरेका छन् ।