काठमाडौं- दक्षिण चीन सागरमा अमेरिकी नौसेनाका लडाकु विमान र हेलिकोप्टर दुर्घटनाग्रस्त भएको छ । आधा घण्टाको अवधिमा लडाकु विमान र हेलिकोप्टर दुर्घटनामा परेको अमेरिकी टेलिभिजन सीएनएनले जनाएको छ ।

अमेरिकी नौसेनाले स्थानीय समयअनुसार दिउँसो पौने तीन बजे एमएच–६० आर शिहक हेलिकोप्टर दुर्घटनामा परेको हो । यो हेलिकोप्टरले अमेरिकी लडाकु विमानवाहक युद्धपोत यूएसएस निमित्जबाट नियमित गस्तीका लागि उडान भरेको जनाइएको छ । हेलिकोप्टरमा सवार चालक दलका तीन सदस्यलाई खोजी टोलीले सकुशल उद्धार गरेको थियो ।

त्यसको ३० मिनेटपछि सोही युद्धपोतबाट उडान भरेको एफ/ए–१८ एफ सुपर होर्नेट विमान पनि दुर्घटनामा परेको हो । यस विमानमा सवार चालक दलका दुई सदस्य पनि बच्न सफल भएका छन् ।

यस वर्ष अमेरिकी नौसेनाले कम्तीमा चार वटा यस्तो लडाकु विमान गुमाइसकेको सीएनएनले उल्लेख गरेको छ ।

पछिल्लो समय दक्षिण चीन सागरमा तनाव बढिरहेका बेला अमेरिकी नौसेनाका हेलिकोप्टर र लडाकु विमान दुर्घटनामा परेको हो । हाल अमेरिकी राष्ट्रपति डोनाल्ड ट्रम्प एशिया भ्रमणमा रहेका बेला दक्षिण चीन सागरमा पछिल्लो घटनाक्रम विकास भएको हो ।