काठमाडौं – स्पेनको चर्चित ‘एल क्लासिको’मा रियल म्याड्रिडले पहिलो हाफ सकिँदासम्म बार्सिलोनामाथि २–१ को अग्रता बनाएको छ। स्यान्टियागो बेर्नाबेउमा जारी खेलमा दुई टिमबीचको प्रतिस्पर्धा सुरुदेखि नै रोमाञ्चक बनेको छ।

खेलको २२औं मिनेटमा रियलका स्टार फरवार्ड केलियन एम्बाप्पेले उत्कृष्ट फिनिसिङ गर्दै घरेलु टोलीलाई अग्रता दिलाए। त्यसपछि बार्सिलोनाले खेलमा फर्कने प्रयासलाई सफल बनाउँदै ३८औं मिनेटमा फर्मिन लोपेजले बराबरी गोल फर्काए। तर पहिलो हाफको अन्त्यतिर ४३औं मिनेटमा जुड बेलिङ्घमले आकर्षक गोल गर्दै रियल म्याड्रिडलाई पुनः अग्रता दिलाए।

यसअघि, दुबै टिम लिगको शीर्ष स्थानका लागि प्रतिस्पर्धामा रहेका छन्। रियल म्याड्रिड २४ अंकसहित लिगको शीर्ष स्थानमा छ भने बार्सिलोनासँग २२ अंक छ। पछिल्ला केही सिजनमा बार्सिलोनाले एल क्लासिकोमा राम्रो प्रदर्शन गरे पनि आजको खेलमा रियलले सुरुवाती हाफमै प्रभाव जमाएको छ।

टोलीहरूबीचको यस ऐतिहासिक भिडन्तमा चोटका कारण दुवैतर्फका केही प्रमुख खेलाडी अनुपस्थित छन्। बार्सिलोनाका रोबर्ट लेवान्डोव्स्की, गाभी र टेर स्टेगन खेल्न सकेका छैनन् भने रियल म्याड्रिडका डाभिड अलाबा र एन्तोनियो रुडिगर घाइते सूचीमा छन्।