जनकपुरधाम– छठ पर्वका लागि जनकपुरधामका पोखरी तथा जलाशयहरू सिँगारिएका छन् । आज देखि औपचारिक रूपमा सुरु भएको छठ पर्वका तयारी स्वरूप जनकपुरधामका पोखरीहरू सिँगारिएका हुन् । छठका लागि जनकपुरधामका गंगासागर, अरगजा सागर, दशरथ तलाव, अग्निकुण्ड, धनुषसागर, मटकोरवा पोखरीलगायतका पोखरी तथा जलाशयहरूमा पण्डाल र विद्युतीकरण गरेर सिँगारिएको छ ।

गंगासागर छठ समितिका अध्यक्ष हरिनारायण गुप्ताले विगतभन्दा व्यवस्थित रूपमा घाट सिँगारिएको बताए । उनका अनुसार हरेक वर्ष श्रद्धालुहरूले अर्घका सामग्री घरबाट लिएर आउने गर्छन् र सम्बन्धित घाटमा सजावटको काम गरिन्छ । गंगासागर घाटमा अहिले पण्डाल राख्ने काम भइरहेको छ भने झिलिमिली बत्तीको काम बाँकी रहेको छ । गंगासागरमा तीनवटा समितिले सजावटको काम गर्ने गरेका छन् ।

चार दिनसम्म मनाइने छठ पर्व आज देखि औपचारिक रूपमा सुरु भएको छ । चार दिन लामो यस पर्वमा व्रतालुहरूले दुई दिनसम्म अन्न पानीबिना उपवास बस्नुपर्छ । यस पर्वअन्तर्गत पहिलो दिन आज ‘नहाय–खाय’ हुन्छ । दोस्रो दिन आइतबार दिनभर उपवास रही राति ‘खीर’ बनाई देउतालाई चढाएर खाने गरिन्छ । यस विधिलाई ‘खरना’ भनिन्छ ।

त्यस्तै, तेस्रो दिन सोमबार मूल दिन मानिन्छ, जसमा ठेकुवा, भुसवा आदि कृषिजन्य अन्नको पीठोबाट बनाइएका पकवानहरूसँगै केराको घरी, माटोको हाँडी, सूप, कनसुपती, कलशसहितको घैँटो आदि सामग्री स्वच्छ र पवित्र रूपमा व्यवस्था गरिन्छ ।

साँझ अस्ताउँदो सूर्यलाई अर्घ्य दिइन्छ । चौथो दिन मंगलबार बिहान उदाउँदो सूर्यलाई अर्घ्य दिई पर्वको समापन गरिन्छ । छठ पर्वको अवसरमा संघ सरकारले पर्वको मुख्य दिन सार्वजनिक बिदा दिएको छ भने मधेस प्रदेश सरकारले त्यसको भोलिपल्ट अर्थात् चौथो दिन प्रदेशभर बिदा दिएको छ ।