काठमाडौं – नेकपा (एकीकृत समाजवादी)का पोलिटब्युरो सदस्य तथा केन्द्रीय प्रचार विभागका उप–प्रमुख दामोदर अर्यालले नेकपा (माओवादी केन्द्र) र एकीकृत समाजवादीबीच एकता टुङ्गिएको भनी आएका समाचारहरू असत्य रहेको स्पष्ट गरेका छन्।

शुक्रबार अर्यालले बिभिन्न सञ्चार माध्यमहरूले प्रसारण गरेका दुई पार्टीबीच एकता टुङ्गियो भन्ने समाचारहरू वास्तविकतामा आधारित नरहेको बताए। पार्टीले हालसम्म कुनै पनि दलसँग एकता गर्ने आधार निर्माण नगरेको उनले बताए । यस्तो निर्णय केन्द्रीय समितिबाट मात्र हुनसक्ने उनले जानकारी दिए।

‘हामीले अहिले विभिन्न पार्टीसँग एकताको विषयमा छलफल गर्ने आधार नै निर्माण गरिसकेका छैनौं,’ अर्यालले भने, ‘त्यस्तो आधार केन्द्रीय कमिटीले मात्र निर्माण गर्न सक्छ।’

उनले सबै वामपन्थी शक्तिहरूको एउटै केन्द्र बनाउने लक्ष्यमा पार्टी प्रतिबद्ध रहेको बताए। ‘एउटा वा दुईटा पार्टीसँग मात्र हुने एकताले बृहत् वाम एकतामा अवरोध पुर्‍याउन सक्छ भन्ने तथ्यमा हामी सचेत छौं,’ उनले भनेका छन्

अर्यालले आगामी एकता नेताहरूको वा पार्टीहरूको होइन, विचार र आन्दोलनको एकता हुने बताउँदै त्यसमा जेनजीआन्दोलनको भावना पनि समाहित हुने जनाएका छन्।

उनका अनुसार यस विषयमा चाँडै बस्ने केन्द्रीय कमिटीको बैठकमा विस्तृत छलफल हुनेछ। अन्त्यमा अर्यालले एकता टुङ्गियो भन्ने खालका मिडिया ट्रायल नगर्न सञ्चार माध्यमहरूलाई आग्रह गरेका छन् ।