गौशाला- महोत्तरीको सीमावर्ती क्षेत्र गौराभेदपुरस्थित १६ नम्बर पिल्लर नाकाबाट तस्करी खुलेआम भइरहेको खुलासा भएको छ।

स्थानीयका अनुसार तिहारको टीकाको दिनै ठूलो मात्रामा कपडा, हार्डवेयर, चप्पल, किराना सामग्रीलगायतका सामानहरू भारतबाट तस्करी गरी नेपाल भित्र्याइएको छ।

तस्करी गरिएका सामानहरू शंकर मन्दिरको पश्चिमतर्फ रहेका रामपुकार मण्डल र राउतको घरमा थुपारिएको बताइएको छ। घटनाबारे स्थानीय केही जेन-जी युवाहरूले नेपाल प्रहरी र सशस्त्र प्रहरीका दुवै प्रमुख अधिकारीहरूलाई जानकारी गराएका थिए।

रघुनाथपुरस्थित सशस्त्र प्रहरी बलको गुल्मका डिएसपी वीरेन्द्र खनाललाई समेत खबर गरिएको थियो । तर उनले घटनास्थल पुगेर पनि बरामद नगरी फर्किएको भन्दै स्थानीयले असन्तुष्टि जनाएका छन् ।

ती सामानहरू पछि करिब २० वटा मोटरसाइकलमा राखेर गौशाला सम्म लगिएको थियो। यस घटनाले सीमामा तैनाथ प्रहरी र सशस्त्र प्रहरीबीचको मिलेमतोको आशंका स्थानीयले गरेका छन् ।

सशस्त्र प्रहरी बलको मधेस बाहिनीअन्तर्गत एसपीको कमान्डमा घुमुवा टोली परिचालन गरिएको छ । तर स्थानीयवासीहरूका अनुसार ती टोलीका केही सदस्यको तस्करसँग घनिष्ठ सम्बन्ध छ।

पहिले अनुशासनहीनता र संलग्नताको कारण बाहिनी तानिएका केही घुमुवाहरूलाई फेरि सक्रिय रूपमा परिचालन गरिँदा शंका बढाएको हो। अहिले पनि उनीहरूकै क्षेत्रमै तस्करी बढ्नुले प्रहरी प्रशासनमाथिको प्रश्न झन् गहिरिएको एकजना स्थानीयले बताए ।

स्थानीयवासीहरूले सीमामा देखिएको यस्तो अव्यवस्था र मिलेमतोको तत्काल छानबिन र कारबाहीको माग गरेका छन्। तस्करी बढ्दै गएकोमा स्थानीयले गुनासो गरिरहँदा सशस्त्रका एसपी शेरबहादुर अधिकारी सम्पर्कमा आएका छैनन् । उनलाई सम्पर्कको प्रयास गर्दा पनि सम्पर्क हुन सकेन ।