काठमाडौं– त्रिकोणात्मक अन्तर्राष्ट्रिय मैत्रीपूर्ण फुटबल प्रतियोगिताको पहिलो खेलमा नेपाली महिला टोलीले बलियो टोली इरानसँग खेलिरहेको छ । यी दुई टोलीको खेल अहिले नेपाली समयअनुसार सवा ६ बजदेखि सुरू भएको छ ।

यी दुई टोलीबीचको खेल भारतको शिलोङको जवाहरलाल नेहरू स्टेडियमस्थित पोलो ग्राउन्डमा भइरहेको छ । यो प्रतियोगिताको पहिलो खेलमा इरानले भारतलाई २-० ले पराजित गरिसकेको छ।

नेपालले सात वर्षपछि इरानसँग प्रतिस्पर्धा गर्दैछ । भारतीय मैदानमै भएको हिरो गोल्ड कपमा नेपालले इरानलाई त्यसबेला ३-० ले पराजित गरेको थियो ।

इरानलाई हराउने टोलीको कप्तान रेनुका नगरकोटे थिइन् । त्यसबेला टिममा सावित्रा भण्डारी ‘साम्बा’ र अनिता बस्नेत पनि थिए । नेपालले इरानलाई हराउँदा साम्बाले २ र अनिताले एक गोल हानेकी थिइन् ।

यो खेलमा करिब ५ महिनापछि गोल रक्षक अञ्जिला तुम्बाप्पो सुब्बा पोस्ट सम्हाल्न फर्किएकी छन् । उनलाई मुख्य प्रशिक्षक नवीन न्यौपानेले टीममा बोलाएका हुन् ।

अञ्जिलाले यसअघि गत जुनमा थाइल्यान्डविरुद्ध खेलेकी थिइन्। त्यस खेलमा नेपाल पराजित भएको थियो ।

यो प्रतियोगितामा नेपालले अब दोस्रो खेल मंगलबार भारतसँग खेल्ने तालिका छ। यस प्रतियोगितापछि नेपालले कात्तिक १३ गते भारतसँग मैत्रीपूर्ण खेल खेल्ने छ।

क्लबको जिम्मेवारीका कारण कप्तान साम्बा र प्रीति राईले भने त्यो खेल गुमाउने बताइएको छ। साम्बा न्युजिल्याण्ड र प्रीति जोर्डन क्लबबाट व्यवसायिक फुटबल खेल्दै आएका छन्।