काठमाडौँ- बंगलादेशकी पूर्वप्रधानमन्त्री शेख हसिनाविरुद्धको मुद्दामा बिहीबार सुनुवाइ पूरा भएको छ। यो मुद्दामा आउँदो नोभेम्बर १३ मा फैसला सुनाइने बंगलादेशका महान्यायाधिवक्ताले बताएका छन्।

हाल भारतमा निर्वासनमा रहेकी हसिनामाथि गत वर्ष जुलाईमा भएको विरोध प्रदर्शनका क्रममा मानवताविरुद्धको अपराध गरेको आरोप छ।

न्युज एजेन्सी एएफपीका अनुसार, हसिनाको अनुपस्थितिमा जुन १ मा उनीविरुद्ध मुद्दा थालिएको थियो। प्रत्यक्षदर्शीको बयानमा उनले सामूहिक हत्याको आदेश दिएको आरोप लगाइएको थियो।

साक्षीमा एक त्यस्ता व्यक्ति पनि थिए जसको अनुहार गोली लागेर क्षतविक्षत भएको थियो।

एएफपीका अनुसार, अभियोजकले अदालतमा प्रहरीद्वारा प्रमाणित अडियो टेप पनि बजाएका थिए। त्यसमा हसिनाले सुरक्षा बललाई प्रदर्शनकारीमाथि घातक हतियार प्रयोग गर्न सिधा आदेश दिएको संकेत थियो।

अदालतसँग अभियोजकले दोषी पाइएमा हसिनालाई मृत्युदण्डको सजाय सुनाउन माग गरेका छन्।