सोलुखुम्बु- सोलुखुम्बुमा रहेको ६ हजार ९५८ मिटर उचाइको नुम्बुर हिमालको चुचुरोमा पहिलोपटक मानव पाइला परेको छ। पर्यटन विभागले आरोहणखुला गरेको एक वर्षपछि सेभेन समिट ट्रेकमार्फत तीन विदेशी आरोहीले हिमालको सफल आरोहण गरेका हुन्।

इटालियन नागरिक हर्भ, जर्मन नागरिक फेलिक्स, र पोल्याण्डका आडमले १५ घण्टाको समय लगाएर आइतबार हिमालको सफल आरोहरण गरेको विभागले जनाएको छ।

पर्यटन व्यवसायी फुछिरी शेर्पाका अनुसार यो सफलतासँगै यी तीन आरोहीले नुम्बुर हिमाल आरोहणको इतिहास रचेका छन्।

सोलुदुधकुण्ड नगरपालिका–१ मा अवस्थित नुम्बुर हिमाललाई दुधकुण्ड तालको शीर मानिन्छ। नगर प्रमुख नाम्गेल जाङ्बु शेर्पाले नुम्बुर आरोहण सफल भएसँगै यस क्षेत्रको पर्यटनमा नयाँ ढोका खुलेको बताए।

सफल आरोही टोलीलाई वडाध्यक्ष छोङ्बा शेर्पा र पर्यटन व्यवसायी फुछिरी शेर्पालगायतले संयुक्त रूपमा स्वागत गरेका थिए।