काठमाडौँ- नेपाली राष्ट्रिय महिला फुटबल टिमकी कप्तान सावित्रा भण्डारीले इरानविरुद्ध मैदानमा उत्रिन आफूहरू तयार भएको बताएकी छन्।

शुक्रबार नेपाल मैत्रीपूर्ण त्रिदेशीय फुटबलअन्तर्गत इरानसँग भिड्दैछ। खेलका लागि नेपाल भारत पुगिसकेको छ।

‘नेपाल इरानविरुद्ध खेल्न तयार छ। भारत आइसकेपछि हामीले मैदानको पनि अवलोकन गरिसकेका छौँ,’ उनले भनिन्, ‘हामी सबै इरानविरुद्ध खेल्न मानसिक र शारीरिक रूपमा तयार छौँ।’

नेपाल र इरानबीचको खेल जवाहारलाल नेहरु रंगशालामा नेपाली समयअनुसार शुक्रबार साँझ सवा ६ बजे सुरु हुनेछ।
त्रिदेशीय खेलअन्तर्गतको उद्घाटन खेलमा भारत र इरान भिडेका थिए। जसमा इरानले घरेलु टोलीमाथि २-० गोलको जित दर्ता गर्दै प्रतियोगितामा सुखद् सुरुवात गरिसकेको छ।

नेपाल पनि पहिलो खेलमै जित दर्ता गरी सुखद सुरुवात गर्न चाहन्छ भने इरान लगातार जितको खोजीमा छ। प्रतियोगितामा हरेक देशले २ खेल खेल्नेछन् भने शीर्ष टोली बिजेता बन्नेछ।

प्रतियोगिताको ट्रफी आज अनावरण गरिएको छ।