काठमाडौं– हिन्दुहरूको दोश्रो महानचाड तिहार सकिने चरणमा पुगेको छ । तिहारको विशेष पक्ष भनेको देउसी, भैलो र यमपञ्चक हो । तिहारको पाँच दिन विभिन्न जनावरलाई पनि पुज्ने गरिन्छ।

अहिले काठमाडौं उपत्यका लगायत देशदेखि विदेशसम्म देउसी भैलो गुञ्जिरहेको छ। यही अवसरमा हरेक वर्ष मगर भेजा समाज नेपालले पनि विभिन्न कार्यक्रम गरी देउसी भैलो कार्यक्रम आयोजना गर्दै आएको छ ।

परम्परागत देउसी भैलोसँगै झौरे नाच, मारूनी लगायतको नाच गान प्रस्तुत गरी देउसी भैलो खेल्दै आएको समाजका अध्यक्ष खिम बहादुर थापा मगरले जानकारी दिए ।

गाउँघरमा जस्तो नभए पनि तिहारमा विभिन्न आफन्त र व्यक्तिहरूको घरघरमा गएर देउसी खेल्दै आएको र पछिल्लो समय आफ्नो परम्परा, संस्कृति लोप हुँदै गएकोमा नयाँ पुस्तालाई पनि देउसी भैलो लगायतका हाम्रो संस्कृतिबारे जानकारी दिने उद्देश्यले हरेक वर्ष कार्यक्रम आयोजना गरेको मगरले बताए।

तस्बिरहरू : नेपाल फोटो लाइब्रेरी