काठमाडौं– चिनियाँ राष्ट्रपति सी चिनफिलको राजकीय भ्रमणका क्रममा प्रभावकारी रुपमा सुरक्षा व्यवस्था काम राखेको भन्दै गृहमन्त्री रामबहादुर थापा‘बादल’ले सुरक्षाकर्मीहरुलाई धन्यवाद दिएका छ ।

गृहमन्त्री बादलले सुरक्षा निकायका उच्च अधिकारीहरुलाई गृह मन्त्रालयमा डाकेर सी भ्रमणका क्रममा गरिएको सुरक्षा व्यवस्थापनको प्रशंसा गरेका हुन् । सी भ्रमणका क्रममा गरिएको सुरक्षा व्यवस्थापनले नेपालको सुरक्षा अवस्थाबारे अन्तर्राष्ट्रियस्तरमा नै राम्रो सन्देश गएको गृहमन्त्रीले दाबी गरे ।

सरकारले दिएका जिम्मेवारी सुरक्षाकर्मीले धेरै राम्रो ढंगले निभाएको उल्लेख गरेका गृहमन्त्री थापाले सुरक्षा नीति निर्माणमा संलग्नदेखि सडकमा खटिने सुरक्षाकर्मीसम्मको योगदानले राष्ट्रपति सीको भ्रमण सफल भएको टिप्पणी गरे ।
चिनियाँ पक्षले समेत भ्रमणको क्रमममा नेपालले गरेको सुरक्षा व्यवस्थाको प्रशंसा गरेको गृहमन्त्री थापाले बैठकमा जानकारी गराए ।

गृहमन्त्री थापाले नेपाल ‘एक चीन नीति’प्रति प्रतिबद्ध रहेको दोहाराउँदै आगामी दिनमा पनि नेपालबाट चीन विरोधी कुनै गतिविधि नहोस् भनेर सतर्क रहन सुरक्षा निकायका प्रतिनिधिहरुलाई निर्देशन दिए ।

चिनियाँ राष्ट्रपति सीको नेपाल भ्रमण ऐतिहासिक भएको तथा नेपालको आर्थिक, सामाजिक, सास्कृतिक विकासमा यो भ्रमण कोशेढुङ्गा सावित हुने गृहमन्त्री थापाको भनाइ थियो ।

बैठकमा गृहसचिव प्रेमकुमार राईले सफल सुरक्षा व्यवस्थापनका लागि सुरक्षाकर्मीहरुलाई बधाई तथा धन्यवाद दिँदै यो अनुभवले आगामी दिनमा ठुलो सहयोग पुग्ने विश्वास व्यक्त गरे ।

बैठकमा सशस्त्र प्रहरी बलका महानिरीक्षक शैलेन्द्र खनाल, राष्ट्रिय अनुसन्धान विभागका प्रमुख गणेश अधिकारी, नेपाल प्रहरीका निमित्त प्रहरी महानिरीक्षक (एआईजी) पुस्कर कार्की, नेपाली सेनाका उपरथी शशिचन्द्र बहादुर सिंह लगायत सहभागी थिए ।