काठमाडौं- प्रधानमन्त्री सुशीला कार्कीले भ्रष्टाचारको छानबिन अघि बढाएपछि केही नेताहरू के के बोल्दै हिँडेको बताएकी छन् ।

गत भदौ २३ र २४ गते भएको जेन-जी आन्दोलका घाइतेहरूले भ्रष्टाचार र दमनमा संलग्नमाथि कारबाही थाल्न दबाब दिएपछि कार्कीले यस्तो बताएकी हुन् ।

उनले नेकपा एमालेका अध्यक्ष केपी शर्मा ओलीलाई लक्षित गर्दै सरकारी निकायले छानबिन थालेपछि अहिले के के बोल्दै हिँड्न थालेको पनि बताएकी छन् ।

कार्कीले जेन-जी आन्दोलनका दमनकर्ता र भ्रष्टाचारमा संलग्न दुवैमाथि गम्भीरतापूर्वक छानबिन हुने बताएकी छन् ।

मंगलबार बालुवाटारमा ४ घण्टाभन्दा बढी समय भएको छलफलमा जेन-जी आन्दोलनका घाइतेहरूले बाब बढाएपछि उनले यस्तो बताएकी हुन् ।

‘हामी जेन-जी आन्दोलनको मर्मभन्दा बाहिर जाँदैनौँ। प्रक्रियासम्मत ढंगले कानुनी रुपमा तल नपर्ने गरी हामी काम गर्छौँ’, उनले भनिन्, ‘हामी म्यान्डेट अनुसार चल्छौँ। चुनाव पनि हुन्छ, भ्रष्टाचारको अनुसन्धान पनि हुन्छ।’

उनले अहिले राज्यका स्थापित निकायहरूले तीव्र गतिमा भ्रष्टाचारको छानबिन गरिरहेका पनि बताएकी छन् ।

कार्कीले जेन-जी आन्दोलनको जगमा बनेको यो सरकारलाई दबाब दिन बोलिरहनुपर्ने पनि बताइन् । ‘अहिले पनि आ-आफ्नो ठाउँबाट काम भइरहेको छ’, उनले भनिन्, ‘तपाईंहरू बोल्न नछाड्नुहोस्। हामीलाई दबाब दिन पनि नछाड्नुस्।’

उनले आन्दोलनका दमनकर्ता र भ्रष्टाचारीमाथिको कारबाहीले अब नतिजा लिने बताइन् । कार्कीले एमाले अध्यक्ष ओलीतिर लक्षित गर्दै के के बोल्दै हिँड्न थालेको बताइन् ।

‘हेर्नुहोला, अब नतिजा आउँछ। छानबिनमा परेपछि बाहिर कसले के-के बोलिरहेका छन्, सुन्नुभएकै होला’, उनले ओलीतिर लक्षित गर्दै भनिन् ।

ओलीले दुई दिनअघि काठमाडौंमा गरेको पत्रकार सम्मेलनमा कार्की नेतृत्वको सरकारलाई असंवैधानिक भन्दै प्रतिशोध साँध्नतिर लागेको बताएका थिए ।

उनले छानबिनका नाममा राहदानी रोक्का गरेर आफूलाई स्थान हदको अवस्थामा पुर्‍याएको भन्दै सरकारको आलोचना गरेका थिए । यही सरकारले बनाएको गौरीबहादु कार्की नेतृत्वको आयोगमा पनि बयान दिन नजाने अडान उनले राखेका थिए ।