काठमाडौं –नेपाली राष्ट्रिय फुटबल टोलीले मंगलबार (भोलि) जोर्डनसँग खेल्दैछ । जोर्डनको अम्मान अन्तर्राष्ट्रिय रंगशालामा नेपाली समयअनुसार राति पौने १० बजे खेल हुँदैछ ।

फिफा विश्वकप २०२२ तथा एएफसी एसियन कप २०२३ अन्तरगत जोर्डनसँगको ‘अवे’ खेलमा भोलि नेपालले घरेलु टोलीको सामना गर्दैछ ।

आफूभन्दा फिफा वरियतामा ६३ स्थान माथिको टोलीसँग खेल्न लागेको नेपाल तेस्रो पटक विश्वकप छनोटमै जार्डनसँग खेल्दैछ । आजभन्दा ८ बर्ष अगाडि जार्डनसँगको खेलमा मैदान उत्रिएका ५ जना नेपाली खेलाडी अहिले पनि सक्रिय खेलाडी छन् ।

राष्ट्रिय टोलीका नियमित कप्तान विराज महर्जन, उपकप्तान भरत खवास, किरण कुमार चेमजोङ, सुजल श्रेष्ठ र रोहित चन्द अहिले २०११ मा भएको जार्डनविरुद्धको खेल खेलेका थिए ।

यसमध्ये विराज महर्जन र भत खवास मंगलबार जोर्डनसँग खेल्ने टोलीमा छैनन् । विराज फिटनेसका कारण टोलीमा नरहँदा भरत आर्मीको क्याम्पमा व्यस्त रहेकाले टोलीमा छैनन् । तर, रोहित चन्द, सुजल श्रेष्ठ र किरण कुमार चेमजोङ अहिले नेपाली टोलीका महत्वपूर्ण खेलाडीको भूमिकामा रहेका छन् ।

चेमजोङ कप्तानको रुपमा रहँदा सुजल र रोहित नेपाली टोलीको मरुदण्डका रुपमा मैदान उत्रिन्छन् । मंगलबार हुने खेलमा यसअघिको आफ्नो अनुभव लगाउँदै खेलेर नेपालका लागि राम्रो नतिजा दिलाउनु यी तिन खेलाडीका लागि चुनौति छ ।

टोलीका अन्य ८ जना खेलाडीका लागि जोर्डन नयाँ प्रतिद्वन्दी हुनेछ । तर, जोर्डनको टिममा पनि अहिले नयाँ अनुहार आएकाले नेपालले आफ्नै रणनीति अनुसार खेल्नु पर्ने फुटबल विश्लेषकहरु बताउँछन् ।