काठमाडौं – चलचित्र विकास बोर्डको बक्स अफिस रिपोर्ट अनुसार नायक अनमोल केसी स्टारर फिल्म ‘जेरी अन टप’ले सुरुवाती दुई दिनमा दर्शकबाट राम्रो साथ पाएको छ ।

बोर्डका अनुसार पहिलो दिन शुक्रबार यस फिल्म हेर्न २१ हजार २९४ दर्शक हलमा पुगेका थिए । यो दिन फिल्मले ७२ लाख ५९ हजार ४०८ रुपैयाँको ग्रस कलेक्सन गरेको छ ।

यस फिल्मको ग्रस कलेक्सन शुक्रबारको तुलनामा शनिबार बढेको छ । यस दिन ८६ लाख ३८ हजार २१० रुपैयाँ बराबराको ग्रस कलेक्सन भएको छ । २६ हजार ४३३ टिकट बिक्री हुँदा उक्त बराबरको ग्रस कलेक्सन भएको हो ।

यस फिल्मको सुरुवाती दुई दिनको ग्रस कलेक्सन एक करोड ५८ लाख ९७ हजार ६१८ रुपैयाँ पुगेको छ ।

यो ग्रस कलेक्सन औषतभन्दा निकै उच्च हो ।

ट्रेलरदेखि नै चर्चा पाएको यस फिल्मले दर्शकबाट सकारात्मक प्रतिक्रिया पाएको छ । आइतबार पनि यो फिल्म उच्च अकुपेन्सीका साथ चलेको छ ।

यस फिल्ममा अनमोलसहित नायिकाहरु जसिता गुरुङ र आँचल शर्मा शीर्ष भूमिकामा छन् । नायक भुवन केसी र केदार घिमिरे ‘माग्ने बूढा’ पनि मुख्य भूमिकामा रहेका छन् ।