काठमाडौं– बैंकहरूले सामाजिक उत्तरदायित्व बापत खर्च गर्ने रकम जेन-जी आन्दोलनका शहीद परिवार घाइतेको निम्ति खर्च गर्न सक्ने भएका छन् । नेपाल राष्ट्र बैंकले बैंकल तथा वित्तीय संस्थाको संस्थागत सामाजिक उत्तरदायित्व सम्बन्धी मार्गदर्शन, २०८१ (प्रथम संशोधन, २०८२) गर्दै सो व्यवस्था गरेको हो ।

केन्द्रीय बैंकले मार्गदर्शनमा व्यवस्था गर्दै सामाजिक उत्तरदायित्व बापत खर्च गर्ने रकम जेन-जी आन्दोलनमा घाइते भई सरकारी अस्पतालमा उपचाररत गरिब तथा विपन्न वर्गका औषधि उपचारको लागि दोहोरो नपर्ने गरी उक्त अस्पताललाई उपलब्ध गराइने खर्चमा गर्न सकिने व्यवस्था गरेको छ ।

त्यस्तै, जेन-जी आन्दोलनमा शहीद भएका व्यक्तिका, आय आर्जनका लागि प्रत्यक्ष रोजगारी नभएका परिवारको आय आर्जन क्षमता अभिवृद्धि गर्न सहयोग पुर्‍याउन नेपाल सरकार वा नेपाल सरकारबाट स्वीकृति प्राप्त सिपमूलक तालिम प्रदान गर्ने संस्थाबाट त्यस्ता व्यक्तिलाई सिपमूलकतालिम प्रदान गरेको आधारमा तालिम प्रदान गर्ने संस्थालाई खर्च प्रदान गर्न सो रकम खर्च गर्न सकिने राष्ट्र बैंकले मार्गदर्शनमा व्यवस्था गरेको छ ।