काठमाडौं- नेपाली कांग्रेसभित्र विशेष महाधिवेशन माग गर्दै संकलित हस्ताक्षर बुधबार कार्यवाहक सभापति पूर्णबहादुर खड्कालाई बुझाउने तयारी भएको छ ।

मंगलबार हस्ताक्षर बुझाउन पार्टी कार्यालय सानेपामा जम्मा भएका नेता-कार्यकर्तालाई महामन्त्री गगन थापा र विश्वप्रकाश शर्मा रोकेका थिए ।

उनीहरूले रोकेपछि बुधबार हस्ताक्षर बुझाउने तयारी भएको हो । नेता-कार्यकर्ताले मंगलबार नै हस्ताक्षर बुझाउन पाउनुपर्ने मागसहित नारबाजी गरे।

त्यसपछि महामन्त्री थापाले मंगलबार केन्द्रीय कार्यसमिति बैठकमा सभापति शेरबहादुर देउवाले कार्यबाहक सभापति तोकिसकेको बताए । देउवाले महाधिवेशन समयमै गर्न निर्देशन दिएकाले उनको सम्मानस्वरुप बुधबार मात्रै विशेष हस्ताक्षर बुझाउन आग्रह गरे ।

मंगलबार केन्द्रीय समिति बैठकमा सभापति देउवाको अन्तिम उपस्थिति भएकाले त्यसलाई सम्मान गर्दै केन्द्रीय समिति अरू एजेण्डमा प्रवेश नगरेको उनले बताए।

थापाले बुधबार दिउँसो ३ बजे नेता-कार्यकर्तालाई पार्टी कार्यालयमा स्वागत गरेर हस्ताक्षर कार्यबाहक सभापतिलाई बुझाउने व्यवस्था गरिने विश्वास दिलाए ।

विशेष महाधिवेशन माग गर्दै कांग्रेसका नेता-कार्यकर्ताले हस्ताक्षर संकलन गरेका थिए। उनीहरूले ५० प्रतिशत भन्दा बढी प्रतिनिधिको हस्ताक्षर बटुलेको दाबी गरेका छन्।

विशेष महाधिवेशनका लागि हस्ताक्षर गर्नेको संख्या मंगलबार दिउँसोसम्म ५४ प्रतिशत नाघेको थियो । कांग्रेसको १४ औँ महाधिवशेनमा ४७४३ महाधिवेशन प्रतिनिधि थिए ।

१३ औँ महाधिवशेनबाट १४ औँ महधिवेशनमा स्वत: प्रतिनिधि भएका केन्द्रीय सदस्य, पार्टी छाडेका र मृत्य भएका प्रतिनिधि घटाउँदा हाल कायम ४५ सय ५६ जना हुन्छ ।

हाल कायम महाधिवशेन प्रतिनिधिमध्ये २४ सय ८७ जनाले विशेष महाधिवशेनको पक्षमा हस्ताक्षर गरेका बताइएको छ । त्यो संख्या अहिलेका प्रतिनिधिमा ५४.५८ प्रतिशत हुन्छ ।

यो हस्ताक्षर पनि महामन्त्री थापा र शर्माकै पहलमा संकलन गरिएको हो । यही मंसिरभित्र नियमित महाधिवशेन हुन नसके विशेष महाधिवशेन गर्नुपर्ने माग यी दुई नेताले गरेका छन् । कांग्रेसको विधानमा ४० प्रतिशत महाधिवशेन प्रतिनिधिको हस्ताक्षरसहित माग भए विशेष महाधिवशेन बोलाउनुपर्छ ।