काठमाडौं– सत्तारुढ दल नेपाल कम्युनिस्ट पार्टीका अध्यक्ष पुष्पकमल दाहाल प्रचण्डले राजनीतिमा असम्भव भन्ने केही नभएको बताएका छन् ।

नेपाली कांग्रेसले आयोजना गरेको चियापान र शुभकामना आदानप्रदान कार्यक्रममा प्रचण्डले राजनीतिमा असम्भव भन्ने केही नभएको र असम्भव देखिने कुरा पनि राजनीतिक पार्टीको सहकार्यमा सम्पन्न बनाउन सकिने बताए ।

नेपाली कांग्रेसले शुरु गरेको चियापान संस्कृति राजनीतिक सहकार्यलाई अक्षुण राख्ने माध्यम बनेको भन्दै प्रचण्डले आगामी दिनमा पनि दलहरुबीचको सहकार्य जारी रहनुपर्ने बताए ।

गिरीजा प्रसाद कोइराला र आफूले हस्ताक्षर गरेको शान्ति प्रकृयाले सहयात्राको नयाँ अभियान प्रमाणित गरेको उनको भनाइ थियो ।

‘त्यतिवेला लिएका संकल्प र प्रतिवद्धता प्रति दृढ रहने र देशको राष्ट्रिय स्वाधिनता र जनताको समृद्धिको आकांक्षाको सम्बोधन गर्ने कुरा नै मुख्य हो’ प्रचण्डले भने ।