काठमाडौं– चीनसँगको निर्भरता घटाउन भियतनामको भिनग्रुपले स्टिल उद्योगमा प्रवेश गर्ने घोषणा गरेको छ । यस समूहले ३८ करोड डलरको लगानीमा ५० लाख टन क्षमताको स्टिल कारखाना स्थापना गर्ने घोषणा गरेको हो ।

निक्के एशियाका अनुसार दक्षिणपूर्वी एशियाली मुलुकहरुमध्ये भियतनाम सबैभन्दा धेरै स्टिल आयात गर्ने मुलुक हो । यस वर्षको पहिलो नौ महिनामा भियतनामले १ करोड १२ लाख टन स्टिल आयात गरेको छ ।

भियतनाम आफ्नो स्टिल आयातमा चीनसँग निर्भर रहँदै आएको छ । यस वर्षको नौ महिनामा भियतनामले ६० प्रतिशत स्टिल चीनबाट आयात गरेको छ ।

भिनग्रुपले भियतनामको हान टिन्ह प्रान्तस्थित भुङआङ औद्योगिक क्षेत्रमा कारखाना स्थापना गर्न लागेको निक्के एशियाले उल्लेख गरेको छ । यस कारखाना स्थापना भएसँगै स्टिल आयातमा चीनसँग भियतनामको निर्भरता घटेर जाने अपेक्षा गरिएको छ ।

भिनग्रुपले प्रविधि, उद्योग, व्यापार, सेवा, ऊर्जाजस्ता क्षेत्रमा काम गर्दै आएको छ । अब यस समूहले स्टिल उत्पादन पनि गर्न लागेको हो ।