काठमाडौं– रुसी राष्ट्रपति भ्लादिमिर पुटिनले डिसेम्बरमा हुन लागेको आफ्नो भारत भ्रमणअघि प्रधानमन्त्री नरेन्द्र मोदीसँग कुराकानी गरेका छन् । कुराकानीका क्रममा दुई नेताबीच द्विपक्षीय रणनीतिक साझेदारीलाई मजबुत बनाउने विषयमा पनि कुराकानी भएको छ ।

टेलिफोन वार्ताका क्रममा पुटिनले मोदीलाई ७३ औँ जन्मदिनको शुभकामना पनि दिएका थिए । उनले मोदीलाई सुस्वास्थ्य र उत्तरोत्तर प्रगतिको कामना गरेको भारतीय समाचार संस्था एएनआईले जनाएको छ ।

कुराकानीका क्रममा डिसेम्बरमा हुन लागेको भारत–रुस वार्षिक सम्मेलनको तयारीबारे पनि छलफल भएको थियो । यसअघि गत सेप्टेम्बर २७ मा पनि दुई नेताबीच कुराकानी भएको थियो ।

रुस र भारत लामो समयदेखि महत्वपूर्ण साझेदारका रुपमा रहँदै आएका छन् । मोदीको प्रधानमन्त्रीकालमा यी दुई देशबीचको साझेदारी थप मजबुत बन्दै गएको रिपब्लिक वल्र्डले उल्लेख गरेको छ ।