काठमाडौं– दुई दिने नेपाल भ्रमणको समापन गर्दै चिनियाँ राष्ट्रपति सी चिनफिङ आज स्वदेश फर्कदै छन् ।

आज विहान देखि नै भेटवार्तामा व्यस्त रहेका सीले नेकपाका सचिवालय नेताहरुसँग सामूहिक छलफल गरेका छन् । त्यसपछि उनले नेकपाका अध्यक्ष प्रचण्डसँग भेटवार्ता गर्ने कार्यक्रम छ ।

होटल सोल्टीमा भेटघाटका कार्यक्रमहरु तय भएका छन् ।

प्रचण्डसँगको भेटवार्तापछि सीले प्रधानमन्त्री केपी शर्मा ओलीसँग भेटवार्ता गर्ने कार्यक्रम रहेको छ । त्यसक्रममा चीन र नेपालबीच द्वीपक्षीय सम्झौताहरु हुने छन् ।

यी सम्पूर्ण कार्यक्रमहरु सकिएसँगै सी आजै दिउँसो एक बजे चीनका लागि प्रस्थान गर्ने कार्यक्रम रहेको छ ।

उनी आइतवार मध्याह्न १२ बजेपछि स्वदेश फिर्ताका लागि विमानस्थल जाने र दिउँसो १ बजे चीनका लागि प्रस्थान गर्ने कार्यक्रम रहेको छ ।

सवारी आवागमन अवरुद्ध

सी विमानस्थल जाने भएसँगै सी हिँड्ने रुटमा सवारी आवागमन पूर्ण रुपमा बन्द हुनेछ ।

सी बसेको होटल सोल्टी देखि कालिमाटी, त्रिपुरेश्वर , माइतिघर , बानेश्वर, तिनकुने, सिनामंगल र एयरपोर्टसम्मको रुट पूर्ण रुपमा बन्द रहने छ भने सर्वसाधारणको आवागमन पनि अवरुद्ध हुने छ ।

सीको उडान अघि र केही बेर पछि विमानस्थलबाट पनि अन्य उडानहरु हुने छैनन् ।