काठमाडौं – एसिया कप अन्तर्गत सुपर फोरको अन्तिम खेल सुपर ओभरमा गएको छ । एक खेल अगाडि नै फाइनल पुगेको भारत र सुपर फोरबाट बाहिरिएको श्रीलंकाबीचको खेल सुपर ओभरमा गएको हो ।

श्रीलंकासँगको खेल सुपर ओभरमा भारतले जितेको छ । पहिलो ब्याटिङ गरेको भारतले पूरै २० ओभर खेल्दै पाँच विकेटको क्षतिमा २०२ रन बनाएको थियो । भारतका लागि अभिषेक शर्माले अर्धशतक बनाए । ३१ बल खेलेका उनले आठ चौका र दुई छक्काको मद्दतमा ६१ रन बनाएका हुन् । उसका लागि तिलक वर्माले नटआउट ४९ रन बनाए ।

जवाफी ब्याटिङ गरेको श्रीलंकालेसमेत समान पाँच विकेटको क्षतिमा २०२ रन नै बनाएपछि खेल सुपर ओभरमा गएको हो । श्रीलंकाका लागि ओपनर पथुम निस्सान्काले शतक प्रहार गर्दा कुसल परेराले अर्धशतक बनाए । पथुमले ५८ बलको सामना गर्दा ६ छक्का र सात चौकाको मद्दतमा १०७ रन बनाउँदा परेराले ३२ बलमा ५८ रन जोडे । जवाफी ब्याटिङमा समान २०२ रन बनाए पनि श्रीलंका सुपर ओभरमा चुकेको हो ।

सुपर ओभरमा सुरुमा ब्याटिङ गरेको श्रीलंकाले दुई विकेट गुमाउँदै दुई रन मात्र बनाउन सक्यो । मात्र तीन रनको लक्ष्य पाएको भारतका लागि सुपर ओभरको पहिलो बलमै कप्तान सूर्यकुमार यादवले ३ रन जोडेपछि जित निकालेको हो ।
एसिया कपको फाइनल आइतबार हुँदैछ । फाइनलमा भारत र पाकिस्तान भिड्नेछन् ।