काठमाडौं– जेन–जी आन्दोलनका क्रममा गत भदौ २४ गते ललिपतुको नख्खु कारागारबाट भागेका नक्कली भुटानी शरणार्थी प्रकरणका अभियुक्तहरू सानु भण्डारी र केशव दुलाल धापाखेलबाट मंगलबार पक्राउ परेका छन् ।

उनीहरू दुवैजनालाई धापाखेलबाट पक्राउ गरिएको काठमाडौं उपत्यका प्रहरी कार्यालयका प्रमुख एआईजी दानबहादुर कार्कीले बताएका छन् ।

गत भदौ २४ सहकारी ठगीमा थुनिएका राष्ट्रिय स्वतन्त्र पार्टीका सभापति रवि लामिछाने बाहिरिएसँगै नख्खुबाट अधिकांश कैदी निस्किएका थिए ।

फरार कैदीहरू कतिपय आफैं जेल फर्किएका छन् । तर नफर्किनेहरूलाई प्रहरीले धमाधम पक्राउ गरिरहेको छ ।

देशभरका कारागारबाट भागेका १५ हजारमध्ये अझै ९ हजार कैदीबन्दी सम्पर्कविहीन छन् । प्रहरीले उनीहरूलाई पक्राउ गर्न विशेष अपरेशन चलाएर खोजतलास तीव्र बनाएको छ । मंगलबार एमाले नेता टोपबहादुर रायमाझी केन्द्रीय कारागारमा फर्किएका छन् ।