काठमाडौं– नेपाल टेलिकमले मनाङमा फोरजी सेवा सञ्चालनमा ल्याएको छ । टेलिकमले भू–धरातलीय हिसाबले दुर्गम मानिने क्षेत्रमा नयाँ बीटीएस स्थापना गरी मोबाइल सेवाको गुणस्तर अभिवृद्धि गरेको हो ।

टेलिकमका अनुसार यसअघि पिसाङ, डावल, टंकी मनाङ र खाङसार क्षेत्रमा भी–साट प्रविधिबाट टूजी सेवा मात्र सञ्चालन हुँदै आएको थियो । तर, ती स्थानहरू पर्यटकका दृष्टिले पनि महत्त्वपूर्ण भएकाले असोज ४ गतेदेखि फोरजी सेवा सुरु गरिएको हो । बेंसीसहर–खाङसार एडीएसएस लिंक सञ्चालन भएपछि फोरजी सेवा सम्भव भएको टेलिकमले जनाएको छ ।

यस्तै, चामे गाउँपालिका–३ को कोटोगाउँमा नेटवर्क कमजोर भएको गुनासो आएपछि असोज १ गतेदेखि नयाँ बीटीएसमार्फत टूजी र फोरजी सेवा सुरु गरिएको टेलिकमले जनाएको छ । नासोङ गाउँपालिका–१ तालगाउँमा पनि असोज ५ गतेदेखि फोरजी सेवा थप गरिएको छ ।