काठमाडौँ – नेकपा (माओवादी केन्द्र) का सांसद माधव सापकोटा सुवोधले वर्तमान परिस्थितिलाई गम्भीर भन्दै जंगी अड्डाले नेपालको वास्तविकता र अग्रगमनलाई चुनौती दिएको आरोप लगाएका छन् ।

सांसद सापकोटाले‍ नेपाली सेनाले राष्ट्रिय संकट निम्त्याएको आरोप पनि लगाएका छन्।

‘जस्तोसुकै संकटमा पनि हामी विचलित हुँदैनौँ, नेपाली जनताको सार्वभौमिकताको रक्षाका लागि निरन्तर लडिरहनेछौँ’, उनले भने । सापकोटाले पार्टीका सबै सदस्य र अग्रगमनका पक्षधर नागरिकलाई धैर्य र साहस कायम राख्न आह्वान गरेका छन् ।

सुवोधले पार्टी अध्यक्ष पुष्पकमल दाहाल ‘प्रचण्ड’ लाई प्रत्येक दिन जनताबीच ल्याउने प्रयास गरे पनि सुरक्षा खतराको बहानामा जंगी अड्डाले रोकेको दाबी गरे। ‘यो सत्य हो, जंगीअड्डाले उहाँलाई बाहिर निस्कन दिएको छैन,’ उनले भने।

सापकोटाले परिस्थितिलाई आधीबेहरीसँग तुलना गर्दै परिवर्तन र अग्रगमनको पक्षमा माओवादी सदैव अग्रपंक्तिमा रहने विश्वास दिलाए। उनले पार्टी समर्थक र कार्यकर्तालाई एकताबद्ध हुन आग्रह गरे।