काठमाडौं– ललितपुरको नख्खु जेलबाट भागेका चर्चित अपराधी एवम् पूर्वराज्यमन्त्री सञ्जय टकलासहित १७ जना ललितपुबाट पक्राउ परेका छन् ।

उनीहरूलाई प्रहरी र सेनासहितको टोलीले ललितपुरको मंगलटारबाट बिहीबार पक्राउ गरेको हो ।

त्यसैगरी सुन्धरास्थित केन्द्रीय कारागारबाट भागेका ४ जना कैदीबन्दी पनि पक्राउ परेका छन् । उता, डोटीको दिपायल सिलगढीस्थित बाल सुधार गृहबाट भागेका ३ जना बालबन्दी पनि समातिएका छन् ।

धादिङस्थित गजुरीमा रहेको धादिङ कारागारबाट भागेका ३९ जना कैदी र बाँकेको डडुवास्थित जयन्दु बालसुधार गृहबाट फरार भएका १६ जना बालबन्दी नियन्त्रणमा आएका छन् ।

बाँकेको नेपालगञ्जस्थित जिल्ला कारागारमा होहल्ला तथा आगजनी गरी बाहिर निस्कन खोजेका कैदीबन्दीलाई नेपाली सेनाले नियन्त्रणमा लिएको छ । त्यस क्रममा १ जना कैदी घाइते भएका छन् ।

उता, ललितपुरको भैँसेपाटी इलाकाको प्रहरी चौकी स्थानीय व्यक्तिहरुद्वारा सरसफाई गरी प्रहरीलाई स्वागत गरेका छन् ।

सेना र प्रहरीले हालसम्म विभिन्न स्थानहरुबाट ९७ नाल हतियारहरू बरामद गरेका छन् । काभ्रेपलान्चोकको बनेपा ९ स्थित नयाँ बस्तीमा फेला परेका ८ वटा सकेट बमलाई नेपाली सेनाले डिस्पोज गरेको छ ।