काठमाडौं– नेपाली कांग्रेसको भ्रातृ संगठन नेपाल विद्यार्थी संघ (नेविसंघ) ले राष्ट्रपति रामचन्द्र पौडेललाई सार्वजनिक गर्न माग गर्दै प्रदर्शन गरेका छन् । 

उनीहरूले बिहीबार नयाँ बानेश्वर क्षेत्रमा राष्ट्रपति पौडेलको पछिल्लो स्थिति सार्वजनिक गर्न माग गर्दै प्रदर्शन गरेका हुन् । 

नेविसंघका नेता शिव रिमालको फेसबुक अकाउन्टमा साझा गरिएको प्रदर्शनको भिडियोमा विद्यार्थीहरू संविधानको रक्षा गर्नुपर्ने, सर्वदलीय बैठक आह्वान गरिनुपर्ने लगायतका नारा लगाइरहेको देखिन्छ । 

जेनजी पुस्ताले गत मंगलबार काठमाडौंमा गरेको प्रदर्शनमा सरकारले बल प्रयोग गरेपछि आक्रोशित भीडले बुधबार राष्ट्रपति भवन शीतलनिवासमा आगजनी गरेका थिए।

आन्दोलनकारी शीतलनिवास प्रवेश गरेपछि नेपाली सेनाले आफ्ना परमाधीपति पौडेललाई सुरक्षित स्थानतर्फ लगेको थियो। राष्ट्रपतिलाई सेनाले शिवपुरीमा रहेको आफ्नो ब्यारेकमा राखेको भनिए पनि औपचारिक रूपमा यसबारे केही जानकारी सार्वजनिक गरेको छैन।

त्यस्तै राष्ट्रपति पौडेलको सचिवालयले पनि औपचारिक रूपमा यसबारे मुख खोलेको छैन। सेना र सचिवालयबाट पछिल्लो अवस्थाका बारेमा औपचारिक जानकारी बाहिर नआएपछि सामाजिक सञ्जालमा उनको खोजी भइरहेको छ। उनीहरू लेखिरहेका छन्, ‘ राष्ट्रपति रामचन्द्र पौडेललाई सार्वजनिक गर।’