काठमाडौं – एसिया कपमा भारतले विजयी सुरुवात गरेको छ। दुबई अन्तर्राष्ट्रिय रंगशालामा बुधबार टस जितेर पहिले ब्याटिङ गरेको युएईलाई ५७ रनमा समेटेको भारतले ५८ रनको लक्ष्य ४.३ ओभरमा ६० रन बनाउँदै पूरा गरेको हो।

भारतविरुद्ध युएईका ओपनर अलिशान सराफुले १७ बलमा २२ रन र कप्तान मोहम्मद वासिमले २२ बलमा १९ रन बनाए केही आशा जगाए पनि सम्पूर्ण टिम १३.१ ओभरमै ५७ रनमा समेटिएको थियो। यूएईका ओपनर बाहेक बाँकी ब्याटर भारतीय बलर सामु टिक्न सकेनन्।

भारतका लागि कूलदीप यादवले ४ विकेट लिए भने शिवम दुबेले ३ विकेट हात पार्दा अरुण चक्रवर्ती, अक्षर पटेल र जसप्रीत बुमराहले समान १/१ विकेट लिए।

५८ रनको सामान्य लक्ष्य पछ्याउन उत्रिएको भारतले सुरुबाटै आक्रामक खेल प्रस्तुत गर्‍यो। शुभमन गिल ९ बलमा २० रन बनाएर अविजित रहे। अभिषेक शर्माले १६ बलमा ३० रन बनाए। त्यसपछि सूर्यकुमार यादवले २ बलमा ७ रन थप्दै जित सुनिश्चित गरे।